Simbahan padayong misupak sa RH Law

CEBU, Philippines - Padayon ang kawsa sa simbahan batok sa RH Law bisan pa og ang Korte Suprema mideklarar na nga wala makalapas sa konstitusyon sa nasud ang mao nga balaod.  Gihulagway ni Cebu Archbishop Jose Palma nga ang pag-aproba sa Supreme Court sa RH Law nagpasabot lang nga kita nagpuyo sa dili perpekto nga katilingban ug tungod niini nagkinahanglan kita og healing dili lang sa “physical sins” apan lakip na sa moral ug spiritual nga aspeto.

Matud sa Arsobispo nga tun-an pa sa Catholic Bishops Conference of the Philippines (CBCP) lakip na sa mga supak sa RH Law ang mga lakang karon nga hingpit na kini nga usa ka balaod una sila mopagawas og desisyon sa sunod nilang lakang nga himuon.

Ang obispo mipadayag sa iyang kabalaka kay ang RH Law iyang napanglantawan nga sinugdanan kini sa kultura nga wala nay respeto sa kinabuhi sa tawo.

Gawas sa kultura ug moralidad, gikwestiyon usab sa Simbahang Katoliko ang kwarta nga magamit sa pag-implementar sa balaod.

Nasayran nga ang Human Life International gipaabot nga mopahigayon og prayer vigil ug ang Archdiocese of Cebu aktibo usab sa pagsalmot sa maong kalihukan. (BANAT NEWS)