Briton ni-molestiya, mi-rape sa mga bata

CEBU, Philippines -  Nasikop sa kapolisan ang usa ka British national nga giingong nimolestya sa tulo ka minor de edad sud sa iyang panimalay niadtong Lunes sa alas 10:00 sa buntag sa usa sa mga barangay sa  dakbayan sa Carcar.

Giila sa Carcar City Police ang suspek nga si Stanley James “Dan” Lamb, 73, taga London, UK nga usa ka pensyonado.

Si  PO2 Camia Codo, ang Women’s and Children’s Protection Desk nga nahinabi sa Banat News miingon nga ang suspek mibiktima sa duha ka 5-anyos ug 9-anyos nga miagi diha sa iyang panimalay.

Sanglit aduna man kini VCD/DVD player diin ang mga bata adto motan-aw og salida sulod sa kwarto niini ug diin gikatahong nahitabo ang pagpangmolestiya.

Nasuta sa imbestigasyon nga ang usa sa mga bata kompirmado sa medical examination nga nahilabtan sa suspetsado. Ipaubos sa psychological ug medical examination ang duha ka 5-anyos.

Gipasakaan na og kasong rape in relation to child abuse ang suspetsado ug kasamtangan kining natanggong sa Carcar City Police Station. (Jo-Anne Archival, CNU Intern/EIM)

Rh Law di unconstitutional apan…

Dili supak sa Konstitusyon ang kontrobersyal nga Responsible Parenthood ug Reproductive Health (RH) Law sumala pa sa desisyon kagahapon sa Korte Suprema.

Apan gideklarar nga unconstitutional ang ubang probisyon niini nga giisip sa uban nga maoy unod sa maong balaod ug kinahanglan kining tangtangon.

Giuyonan sa mga mahistrado ang probisyon sa maong balaod nga nagtugot sa Department of Health sa pagpalit ug pagpanghatag og mga contraceptives ug sa paghatag og “RH Education” sa mga batan-on.

Ang gideklarar nga unconstitutional nga probisyon mao ang Section 7 nga nagmando sa mga hospital nga gipanag-iya sa mga relihiyosong pundok sa paghatag og family planning methods. Gideklarar sab nga unconstitutional ang Section 23 nga nagdili sa mga health providers sa pagbalibad sa pagbuhat ug paghatag og mga health services. Lakip nga gibasura sa Supreme Court mao ang pagdili sa mga doktor nga mobalibad sa pag-refer sa mga pasyente sa RH services, opisyal sa gobyerno nga dili mosuporta sa RH programs, mga minyo nga gusto nga mo-avail sa RH programs bisan way pagtugot sa ilang mga kapikas. Tungod kay gideklarar nga illegal ang maong probisyon ang mga health providers na ang mag-igo kun mohatag ba sila sa maong serbisyo o dili.

Gideklarar sab nga invalid ang Section 17 nga nagmando sa mga gynecologists, obstetricians, medical centers ug mga institusyon paghatag og libreng RH services aron ma-accredit sa PhilHealth. Gibasura sab sa Korte Suprema ang characteristics sa abortifacients isip contraceptives nga maoy hinungdan sa abortion. Matud sa Supreme Court nga tanang contraceptives nga moresulta sa aborsyon, illegal, bisan pa kung secondary effects lang kini.  (BANAT NEWS)