Kapolisan andam na sa Semana Santa
CEBU, Philippines - Ang kapulisan sa lalawigan sa Sugbo andam na sa seguridad alang sa kasaulogan sa Semana Santa sunod semana ilabi na sa Bantayan Island ug sa metro Cebu South.
Si Deputy Provincial Director for Operation, Supt. Anthony Bagarinao, mibutyag nga ang mga personnel sa provincial headquarters ug kadtong mga pulis sa police stations nga dili kaayo busy alang sa Holy Week maoy gamiton ug i-deploy ngadto sa mga lugar nga nagkinahanglan og mga pulis.
Dul-an sa 100 ka mga personnel lakip na ang covert teams ang i-deploy sa Bantayan Island nga naila nga tourist destination panahon sa tingbakasyon lakip na usab ang Metro Cebu South, alang sa Sugat sa Kabanhawan.
Ang amihanang Sugbo panguluhan ni Bagarinao samtang ang habagatang Sugbo panguluhan usab ni Supt. Renato Malazarte.
Hugtan usab sa kapulisan ang seguridad sa ports, wharfs ug mga terminal diin magpunsisok unya ang mga tao.
“Wala gyud ko kabalo ug pila kabuok wharfs naa ang Cebu province pero apil nana sa among security preparation,†matud ni Bagarinao.
Siya midugang nga nakig-alayon na sila sa kapulisan sa Cebu City Police Office sa pagkuha sa mga impormasyon kung si kinsa kadto ang dunay kaso sa pagpanulis, pagpanguot ug pagpangawat aron ilang ma-monitor.
“Basin lang dunay modayo ngadto sa Bantayan nga mangunguot kay tua baya ngadto ang mga tawo halos,†matud niya kinsa midugang nga sunod Martes magsugod na ang deployment unya sa kapulisan sa ilang tagsa-tagsa ka mga assignments. (/EIM)(BANAT NEWS)
- Latest
