CEBU, Philippines - Dul-an 60 ka coastal barangays ang gipahimangnoan nga peligro sa storm surge kon ang pagsuyla sa bawod karong dunay umaabot nga tropical depression nga Domeng sa Sugbo Huwebes sa hapon.
Sa advisory nga giluwatan sa Project NOAH o Nationwide Operational Assessment of Hazards, gipasidan-an ang mga lomulupyo sa baybayon sa 15 ka lungsod sa Southern Cebu gikan sa pagsaka sa tubig. Ang mga lungsod nga nalakip sa "List of localities: Tropical Storm Domeng highest predicted storm surge + tide" nga napatik sa ilang web blog blog.noah.dost.gov.ph, nga angay mag-amping ug mangandam sa posibleng storm surge ug taob sa dagat mao ang Ronda, Balamban, Toledo, Moalboal, Samboan, Badian, Ginatilan, Pinamungajan, Santander, Alegria, Malabuyoc, Oslob, Dumanjug, Barili, ug Aloguinsan.
Ang anaa sa lista nagpasabot nga ang maong mga lugar dunay gibana-bana nga di moubos sa dos metros nga gitas-on sa bawod tungod sa paghiusa sa storm surge ug taub sa dagat. Labing taas nga kadagatan ang masinati karong Miyerkules sa alas-5 sa hapon mao ang duha ka barangay sa Ronda nga duna unyay 2.09 metros.
Hinuon si Oscar Tabada sa Pagasa-Mactan mibutyag kagahapon nga mihinay na ug nahimo na lang nga tropical depression si Domeng ug gituohan nga mohinay pa gyud kini ini og tugpa niini sa kayutaan sa Surigao sa Mindanao karong Huwebes.
Apan duna gihapoy pag-uwan nga masinati. Base sa alas-4 sa hapon kagahapon nga forecast, ang tropical depression "Domeng" gibanabanang anaa sa 670 kilometro sa silangan sa Davao City (6.7°N 132.0°E) ug may hangin nga 55 kph duol sa tunga. Nag-irog kini sa kasadpan-amihanang-kasadpan sa gipaspason nga 13 kph.
Kanal limpyohan
Si Cebu City Mayor Michael Rama nakigkita kagahapon sa nagkalain-laing ahensya sa gobyerno alang sa pagpangandam. Gitahasan ni Rama ang Department of Public Works and Highways (DPWH) nga limpyohan ang mga kanal nga naigo sa ilang road rehabilitation projects sa dakbayan. Si Konsehal Dave Tumulak, ang hepe sa City Disaster Risk Reduction and Management Council (CDRRMO) ug Cebu City Contractors Association, kinsa maoy mopahuwam og mga ekipo sa mga mountain barangays kun dunay landslide mitambong sa maong tigom.
Gagmay’ng panagatan
Samtang ang Philippine Coast Guard nagdili na sa pagpabiyahe sa gagmay nga mga sakyanan sa dagat ilabina sa mga pump boats. Si Cebu Coast Guard Station Commander Rodulfo Villajuan mialerto na sa tanang mga substations niini aron pugngan ang mga gagmay nga mga mangingisda sa paglawig. Giklaro ni Villajuan nga walay gikanselar nga biyahe sa mga barko sukad kagahapon sa udto. (Jessa Agua, Niña Sumacot ug Chester Abadilla/EIM) (BANAT NEWS)