CEBU, Philippines - Usa diay ka panday miangkon nga duha ka adlaw na nga wala siya’y tarong kaon maoy nanglungkab ug nangawat sa opisina sa Cebu City Zoo sa miaging semana.
Si Jonathan Cantuba, 36, nasikop sa kapolisan ug miangkon nga siya ang milungkab sa zoo tungod kay dili na maantos ang iyang kagutom.
Ang tagdumala sa city zoo mitug-an sa kapolisan nga diha’ng nadiskobrehan nila ang pagpanglungkab ilang nasuta nga gipangawat ang pagkaon nga gisulod sa ilang refrigerator.
Matud ni Cantuba nga nahimo niya ang pagpangawat kay wala na siya’y tarong nga panghuna-huna sukad nga gibiyaan siya sa iyang asawa nga midala sa iyang duha ka gagmay’ng anak.
Giangkon usab ni Cantuba nga siya usab maoy mikuha sa tulo ka plastic nga baril apan gihimakak nga miabot og 10 ang tanang baril nga iyang nakuha.
Apil sa giangkon ni Cantuba nga siya usab ang mikuha sa mini iPad ug sa cellphone sa anak ni Giovanie Romarate nga maoy nagdumala sa zoo, apan wala niya angkona nga gikuha ang kahon nga may kwarta.
Nasikop si Cantuba kay mibalik siya duol sa Cebu City Zoo aron ibaligya ang iyang nakawat.
Nakakuha og kasayuran ang kapolisan mao nga dali kaayo nga miresponde ang mga sakop sa Theft and Robbery Section ug City Intelligence Branch (CIB) sa barangay Kalunasan.
Ang iPad ug tulo ka baril narekober sa kapolisan ug apil pa ang usa ka 45 kalibre nga revolver nga wala maapil sa gireport nga nakawat. (BANAT NEWS)