CEBU, Philippines - Patay ang drayber sa printing press human kini pusila sa iyang kauban nga gwardya tungod sa ilang panaglalis pasado alas-4 sa miaging sa hapon.
Ang biktima naila nga si Rey Vaflor, 38, taga Nazareth sa Labangon nga namatay pipila ka oras human siya gioperahan.
Ang suspetsado naila nga si Felimon Luna, 48, taga Sabang, Sibonga nga usa ka stay-in security guard sa SYS Printing ubos sa L&G Security and Investigation Agency.
Base sa imbestigasyon sa Homicide Section sa kapolisan nga ang duha naglalis pasado alas-4 niadtong Sabado. Apan pipila ka minuto ang milabay miinit ang ilang panaglalis mibunot sa iyang isyu nga .38 kalibre nga revolver gikan sa holster ang suspek ug gipusil makausa ka higayon ang biktima.
Nakaangkon og samad sa iyang tiyan ang biktima ug dali kining gidala sa Vicente Sotto Memorial Medical Center alang sa usa ka operasyon. Apan pipila ka oras human sa operasyon namatay kini.
Ang suspetsado mitahan ug gikuyogan sa operations manager sa iyang security agency nga si Leonides Borinaga. Ang suspek anha mitahan ni SPO1 Noel Caretero sa Punta Police ingon man ang kalibre .38 nga iyang gigamit sa pagpusil sa biktima nga may upat ka bala ug usa ka kabhang nga naa pa sa tambor niini. (BANAT NEWS)