Natintal sa dalaga

CEBU, Philippines - Usa ka dalaga nga anak og tindera sa Mandaue Public Market wala makabantay nga gihuboan na siya sa iyang panti ug lugoson na unta sa kawatan nga nagpatong na kaniya samtang maayo’ng paghinanok sulod sa tindahan kagahapon sa kaadlawon.

Swerte kaayo nga nahigmata ang 28-anyos nga babaye diha nga iyang namatngonan nga adunay bug-at nga mipatong kaniya ug may mga kamot nga nagpanghiram sa pribado’ng parte sa iyang lawas samtang siya naghigda sa lantay.

Gipugngan lang sa Banat News ang ngalan sa dalaga aron dili siya maulawan ilabi na nga bag-o pa kini nga migradwar sa kolehiyo ug nagpangita pa og katrabahoan.

Ang dalaga abtik kaayo nga nakasinggit pagkamat-ngon niya nga usa ka tawo ang nagpatong kaniya.

Dali nga miresponde ang mga market guards nga sila si Richard Nacorda ug Rocky Latera human nakadungog sa singgit sa dalaga ug ilang nakit-an ang usa ka lalaki nga paingon na unta nga moikyas gikan sa luyo sa tindahan sa inahan sa dalaga.

Ang lalaki nailhan nga si Marcel Besabella, 26, molupyo sa Sitio Sta. Cruz, Barangay Guizo, dakbayan sa Mandaue ug gitugyan sa mga market guards ngadto sa kapolisan.

Si PO1 Jerome Lendio sa kapolisan sa Presento 1 sa Mandaue City Police Station (MCPO) miingon nga ang dalaga didto matulog sa tindahan gawas sa Mandaue City public market aron mabantayan ang ilang baligya.

Tungod sa kalapoy sa iyang lawas, maayo nga pagkahinanok sa dalaga ug wala makabantay dihang nakasulod si Besabella ka’ng kansang tumong mao ang pagpangawat.

Human masulod ni Besabella sa iyang bag ang P23,300 nga halin sa tindahan, lainlaing baligya, tablet, pahumot, lipstick ug uban pa, nakahuna-huna siya paglugos sa dalaga nga nahinanok sa lantay.

Matud ni PO1 Lendio nga ang dinakpan bisan og anaa na sulod sa bilanggoan nanghulga pa sa dalaga nga iyang patyon kun makagawas kini sa bilanggoan. (Romeo T. Limpangog/RUB)

Duha ka Japanese nasakpang naghithit

Nagtingkagol sa prisohan ang duha ka Hapon human sila nasakpan nga naghithit og marijuana sud sa kasilyas sa usa ka nightclub sa Mango Avenue sa miaging alas 2  sa kaadlawon.

Ang nasikop naila nga sila si San Chi, 25, ug si Yano Fumiaki, 20, nga mga estudyante sa usa ka ESL Center sa Sugbo.

Base sa imbestigasyon sa kapolisan nga ang duha nasakpan mismo sa mga tourist police nga nadestino sa Mango Avenue nga nag-pot session sulod sa kasilyas. Ang duha nasakpan nga migamit sa usa ka wooden pipe aron sa paghingos sa aso sa marijuana. Ang maong wooden pipe duna pay sulod nga dahon sa marijuana.

Dali kining gikompiskar sa mga polis ug gidala ang duha ngadto sa ilang buhatan. Gisumitir sa kapolisan ang ilang nakuha nga dahon sa marijuana ngadto sa PNP Crime Laboratory 7 alang sa eksaminasyon.

Pasakaan og kasong kalapasan sa Section 11 ug 12 sa Article 2 sa Comprehensive Dangerous Drugs Act. Samtang nasikop sa kapolisan sa lungsod sa Medellin ang duha ka mga lalaki sa buy-bust operation nga gipahigayon sa usa ka drug den sa maong lungsod nga gipadagan sa usa ka kanhi polis sa alas 6:30 sa miaging gabii.

Ang nasikop naila nga sila si Rodrigo Loreto alyas Rodior, 31, ug si Edwardo Yaun alyas Bakho, 18, nga mga molupyo sa barangay Antipolo, Medellin.

Dihang mibaligya si Loreto ngadto sa usa ka police poseur buyer og shabu bugti sa P200 nga marked money dali kining gisikop sa kapolisan. Lakip nga nasikop si Yaun nga gituohang mibisita sa maong drug den.

Nakuha gikan kang Loreto ang usa ka pakete nga shabu nga subject sa buy- bust ug ang P200 nga marked money.

Lakip sa nakuha mao ang siyam ka pakete nga shabu, P500 nga gituohang halin, kagamitan sa pagsuyop og shabu, flashlight, resibo sa money forwarder, usa ka bag ug usa ka motor.

Nagtuo ang kapolisan sa lungsod sa Medellin nga ang maong drug den gikatahong gipadagan sa usa ka kanhi polis.

Si Loreto ug ang maong polis nasikop na niadtong tuig 2011 sa kaso sa drugas ug paghupot og armas  ug kasamtangan nga nakapyansa. (Bryner L. Diaz/EIM)

Babayeng napriso kaniadto gipatay

Gipusil patay ang usa ka babaye nga giingong napriso na kaniadto sa kasong may kalambigitan sa ginadiling drugas sa wala ilhing mamumuno sa sitio Lawis, barangay Luray Dos sa dakbayan sa Toledo alas-8:30 sa gabii sa nakalabay’ng adlaw.

Si Dionesia Palao alyas Janet, 44-anyos, nagpuyo sa barangay Dumlog sa syudad sa Toledo gipusil sa iyang ulo sa wala  mailhing lalaki nga nagsakay og  motorsiklo.

Sa inisyal nga imbestigasyon nila ni Police Inspector Gilfred Baroman, PO1 Aldwin Pepito ug PO1 Aguinaldo Alcoseba  sa Toledo Police Station mibutyag nga  naglakaw ang biktima daplin sa ngitngit nga dalan sa nahisgutang lugar  dihang kalit nga nakadungog ang mga residente  og usa ka buto sa armas. Sa pagsusi nila sa lugar napalgan nila si Palao nga nagbuy-od  sa dalan nga naligo sa kaugalingong dugo.

Narekober sa crime scene ang usa ka kabhang sa kalibre .45 nga armas, samtang padayon pang gisuta sa kapulisan ang motibo sa pagpamusil ingon man ang pag-ila sa suspetsado. (BANAT NEWS)