PAGASA adunay pahimangno

CEBU, Philippines - Gitumbok sa Philippine Atmospheric Geophysical Astronominal Services Administration (PAGASA) nga ang nakapasamot sa kainit sa panahon karon mao ang daghan nga lugar nga gipang-semento na ug nahanaw na sa hingpit ang kayutaan.

Ang chief weather forecaster sa PAGASA-Mactan nga si Oscar Tabada miingon nga ang kainit sa adlaw mosumbalik kun moigo ngadto sa mga sementadong lugar sanglit ang kainit sa adlaw dili na man makatuhop.

Matud ni Tabada nga ang kainitsa adlaw nga mosumbalik gikan sa mga sementadong lugar makaapektar sa panlawas sa katawhan. Si Tabada miingon nga panahon sa kagabhion masinati usab ang kaalimoot sanglit minus man kaayo ang paghuros sa hangin panahon sa ting-init.

Iyang gipasabot nga ang makatabang sa pagpaminus sa kainit sa panahon mao g’yud ang mga gipangtanum nga mga kahoy nga maghatag og landong ug kabugnaw sa kagabhion.

Ang publiko gipahimangnoan nga dili magpalabi pagbabad sa adlaw gikan sa alas 10:00 sa buntag hangtud sa alas 3:00 sa hapon kay ang kainit makadaut sa panglawas ilabi na sa adunay high blood pressure. (BANAT NEWS)