CEBU, Philippines - Nakompiskar sa Community Environment and Natural Resources kon CENRO ang 917 ka mga teak trees nga karga sa usa ka trailer truck sa Ouano Wharf niadtong Huwebes sa hapon. Nasayran nga ang trailer truck nga adunay plate number nga GXU-340 gikan sa Albuera Leyte ug midunggo sa maong pantalan. Ang CENRO nakadawat og report kalabot sa maong mga kahoy nga giingong walay saktong shipment documents hinungdan nga ilaha kining giatangan.
Matud ni Dr. Eddie Llamedo sa DENR-7 nga daghan og “inconsistencies†sa mga dokumento. Ang DENR-7 mopadala og notice of hearing sa CENRO office sa Albuera, Leyte kay di sila pwede moisyu og permit tungod kay daghan ra kaayo ang maong kargamento, bugtong regional director lang maoy makaisyu og dokumento alang sa pagbiyahe niini.
Kasamtangan una nga gibutang sa CENRO Cebu City ang mga nakompiskar nga mga kahoy lakip na ang trak tungod kay gamiton kini isip mga ebidensiya.
Ang mga teak trees usa ka premium hardwood species ug magamit kini sa paghimo og balay ug furnitures. Gibanabanang dul-an usa ka milyon ka pesos ang kantidad sa maong nasakmit nga mga kahoy. (/EIM)(BANAT NEWS)