CEBU, Philippines - Gipanid-an karon sa mga kawani sa Department of Trade and Industry (DTI-7) ang presyo sa mga construction materials aron masakpan kadtong mga magpapatigayon nga magpahimulos pinaagi sa pagpamahal sa kantidad sa ilang baligya.
Gipasabut ni DTI-7 Regional Director Asteria Caberte nga sa panahon sa ting-init daghan g’yud ang magpatukod og mga building ug kabalayan ug nabalaka sila nga daghan ang mga magpapatigayon nga mopahimulos sa higayon.
Matud sa opisyal sa DTI nga kun taas ang demanda sa mga construction materials adunay posibilidad nga pahimuslan kini sa ubang tag-iya og mga hardware ug tigbaligya sa mga construction materials.
Ang tighimo sa mga kabilya ug lansang nga anaa magbase sa dakbayan sa Mandaue miadto sa Cebu City Hall ug mipasalig nga dili sila mopahimulos sa higayon.
Gituohan nga ang ubang negosyante og construction materials mopasaka sa presyo sa semento ug kabilya kay mao man kini ang nag-unang materyales sa pagtukod og balay.
Ang DTI motawag sa atensyon sa mga tag-iya og hardware ug construction materials kun masuta nila nga sila mipahimulos sa higayon pinaagi sa pagpausbaw sa kantidad sa ilang baligya.
Apan mibahad ang opisyal sa DTI nga pahamtangan og silot ang mga negosyante og construction materials kun masuta sa ilang pakisusi nga dili na makiangayon ang ilang gihimo pinaagi sa grabe na nga usbaw sa ilang produkto.
Gidasig ni Caberte ang mga pumapalit nga moreklamo sila dayon sa DTI kun makamatikod og grabe nga pagpausbaw sa prisyo sa construction materials aron makahimo dayon sila og tukmang aksyon. (BANAT NEWS)