Kabataan mitambong sa pista ni San Pedro Calungsod

CEBU, Philippines - Gisaulog sa Sugbo ang ikaduhang kapistahan sa Filipino nga Santos nga si San Pedro Calungsod kagahapon.

Gibuksan ang pangilin pinaagi sa pagprosisyon sa kabataan gikan sa Cebu Metropolitan Cathedral ngadto sa Archdiocesan Shrine of San Pedro Calungsod sa Archbishop’s Palace sa D. Jakosalem sa alas 5:00 sa buntag.

Usa sa mga mitambong sa maong prosisyon si Yries John Repollo nga usa ka youth leader kinsa mihulagway nga usa ka milagro alang kaniya ang pagsustiner niya sa iyang pagka “youth leader.”

Matud ni Repollo nga duna siya’y nakat-onang mga pagtulon-an ug hiyas sa labing unang batan-ong Santo.

Si Edna Arellano nga usa ka volunteer sa Commission on Youth sa Artsidiyosesis sa Sugbo miingon nga daghang mga milagro na ang iyang nasinati pinaagi sa pag-ampo kang San Pedro Calungsod mao nga padayon ang iyang debosyon niini.

Si Archbishop Jose Palma sa iyang wali sa Pontifical Mass sa alas 9:00 kagahapon sa buntag misaysay nga samtang siya ug ang kauban niyang kaparian didto sa Roma nakasinati sila og milagro.

Matud niya samtang nagpaabot sila pag-abli sa gibutangan sa picture ni San Pedro Calungsod nakit-an sila sa kalihim sa Secretary of State sa Vatican ug bisan di pa oras pag-abli sa pultahan nga gikahimutangan sa picture sa Santos giablihan kini dayon maong nakasulod sila didto ug nakadalit og pag-ampo ug nakapakuha gyud sila og hulagway didto. (BANAT NEWS)