Cebu City scholar nahimong Cum Laude

CEBU, Philippines -  Usa sa gatosan ka college scholars sa dakbayan sa Sugbo nga migradwar na sa tagsa-tagsa nila ka kurso sa miaging semana nagpasalamat g’yud ni kanhi Mayor Tomas Osmeña sa iyang kalamposan.

Si Jhanel Flores, 19, nga nagpuyo sa Sitio Laguardia, Barangay Lahug miadto g’yud sa panimalay ni Osmeña sa Barangay Guadalupe kagahapon aron sa pagpasalamat sa kanhi mayor.

Matud ni Jhanel nga kun wala pa ang scholarship program sa dakbayan sa Sugbo nga gisugdan pagpatuman kaniadto atol sa administrasyon ni Osmeña, dili g’yud unta siya makalampos sa iyang pagtungha.

Anak lang si Jhanel ug kabus nga mga ginikanan. Ang iyang amahan nga si Solomon usa lang ka family driver nga P300 lang ang sweldo mata’g adlaw samtang wala ‘say trabaho ang iyang inahan.

Si Jhanel mitapos sa iyang sekondarya sa Apas National High School ug mipahimulos sa scholarship program sa dakbayan pinaagi sa pagtungha sa Cebu Normal University (CNU) ug mikuha og Bachelor of Science in Education major in Mathematics.

Sa miaging semana mapagarbohon kaayo ang iyang mga ginikanan dihang midawat siya og diploma ug gitauran og medalya human siya mapili nga maoy Cum Laude sa ilang kurso. Ang mata’g scholar sa dakbayan sa Sugbo makadawat og P10 mil nga scholarship grant mata’g semester. Ang programa nga gisugdan kaniadto ni Osmeña gipadayon usab ni Mayor Michael Rama.   (BANAT NEWS)