CEBU, Philippines - Si Bureau of Fire Protection-7 Assistant Regional Director Esmael Codilla mipadayag nga dili gyud sila mopahawa sa ilang gitukuran nga luna sa ilang buhatan.
Kini bisan pa man og ang kagamhanan sa syudad mohatag usab og bag-ong luna ug building isip hulip sa ilang luna nga giukopahan karon sa Cebu City Medical Center.
Matud pa ni Codilla sa usa ka local radio interview miingon nga ang ilang ulohang buhatan nga padayon nilang gibarugan nga ang gitukoran sa ilang mga buhatan legal nga gipanag-iya sa BFP.
Si Codilla miingon nga usa sa ilang gikabalak-an nga sa higayon nga mosanong sila sa hangyo sa Cebu City government nga bag-ong building ug luna, wala sila’y kasiguroan nga dili na usab sila papahawaon sa syudad kay dili man sila (BFP) ang nagtukod niini ug dili usab ila ang luna.
Nabalaka si Codilla nga masusama na lamang unya sila nga eskwater kun mosanong sila sa pagbuot sa city hall.
Giklaro niini nga mopahawa lamang ang BFP-7 sa ilang nahimutangan karon kun ang syudad makapakita og dokumento nga magmatuod nga ang syudad sa Sugbo maoy legal nga nanag-iya sa luna.
Dugang pa ni Codilla nga andam usab silang moatubang sa mga kaso nga ipasaka unya sa city hall.
Ang Cebu City nagsugod na sa paghawan sa karaang nahimutangan sa CCMC aron sugdan na ang pagtukod sa bag-ong edipisyo nga gitinguhang isumpay sa nahimutangan karon sa BFP-7 nga giangkon sa siyudad nga iya. (BANAT NEWS)