CIB gi-surprise drug test, limpyo

CEBU, Philippines - Gipaubos ang mga sakop sa City Intelligence Branch sa Cebu City Police Office sa usa ka surprise drug test kagahapon sa buntag ug nigawas nga negative sila sa substance use sumala pa sa hepe niini nga Chief Insp. Romeo Santander.

Si Santander nga nahinabi sa mga tigbalita miingon nga 34 ka mga organic personnel sa CIB ang gipaubos sa surprise drug test kagahapon sa buntag.

Lakip sab nga gipaubos sa drug test ang mga intelligence operative sa 11 ka mga presinto sa dakbayan sa Sugbo ug ang napulo ka mga sakop sa Cebu City Public Safety Company.

Si Santander miingon nga usa kini ka paagi sa pagpakita sa mga tawo nga walay gitagoan ang kapolisan.

Dugang ni Santander nga importante kaayo kini tungod kay sila man ang sagad nga modakop sa mga illegal nga drugas sa dakbayan ug nabalaka siya nga duna siya’y sakop nga magpositibo.

Apan kagahapon nasuta nga negatibo ang iyang mga sakop sa susbstance use.                                

Sumala ni Santander nga iya kining gihimo subay sa mando sa hepe sa Regional Intelligence Branch 7 Sr. Supt. Paul Labra. /EIM (BANAT NEWS)