Duha ka sex slaves naluwas

CEBU, Philippines - Usa ka Overseas Filipino Worker ang naluwas sa mga sakop sa kapolisan sa Talisay gikan sa usa ka Amerkanong gidudahang nalambigit sa pagpanghimo og pornographic dihang usa sa iyang mga biktima nga gituohang kapuyo niini na-rescue sa mga kabanay ug kauban sa trabaho gikan sa suspek ang misumbong sa kapolisan kagahapon sa hapon.

Natanggong karon ug gikatakdang pasakaan og kaso ang suspek nga si Lawrence “Larry” Pendarvis , 71, taga Florida, USA, usa ka retiradong chemist. Kinsa nagpundo na sa Sugbo sukad pa sa milabay’ng tuig.

Ang operasyon gipangulohan ni Supt. Reycel Carmelo Dayon uban nila ni PO2 Rechel Abellanosa ug PO3 Violeta Godinez sa Women’s Desk Section tungod sa reklamo sa usa ka 52-anyos nga biyuda nga giingong nabiktima sa suspek apan nakaikyas niadtong adlaw nga Sabado dihang giluwas kini sa mga kauban sa trabaho.

Matud pa nga mibalik ang maong ginang sa police station kagahapon kauban ang mga kaparyentihan ug misumbong sa gidangatan niini sa mga kamot ni Pendarvis sud sa tulo ka semana ug mitug-an kini nga duna pay laing babaye nga anaa pa sa mga kamot sa suspek sud sa usa ka cottage  sa usa ka beach resort sa Pooc, Talisay City. Tungod sa maong reklamo giadto sa kapolisan ang maong cottage ug diha pugsanong gisulod ang maong cottage tungod kay nagdumili ang suspek pag-abli niini. Matud pa nga naabtan nila ang 28-anyos nga babaye nga daw “bangog” pa ingon man ang suspek.

Matud pa nga na-recover sa kapolisan diha sa cottage ang usa ka maleta nga nagkalain-laing gituohang sex enhancement drugs, syringes, camera nga dunay mga dagkong suga, laptop, SD cards. Gidudahan nga nag-shooting og pornographic film ang suspek samtang way kalibotan ang mga biktima niini.

Sumala pa sa usa ka kabanay sa 52-anyos nga nakahinabi sa Banat News nga nanawag kini sa iyang anak niadtong Sabado kay magpatabang tungod kay gimaltrato sila sa maong langyaw. Ang mga paryente ug kauban sa trabaho sa biyuda nakugang sa ilang naabtan nga hubo na ang maong biyuda ug di kabarog ug duna kini inagian og tuok sa liog ug may samad sa ulo.

Ang mga kabanay sa biktima mibutyag nga gituok og cord sa laptop ug giduslak-duslak og ballpen sa suspek.

Sumala pa nga misuway pa og babag kanila ang maong suspek apan wala kini makapiog maong nadala nila sa tambalanan ang ginang, apan kagahapon miinsister ang biyuda nga balikon gyud ang 28-anyos nga iyang kauban aron kini luwason maong midangop sila sa kapolisan.  Sa pagresponde sa grupo ni Dayon diha sa dapit, ilang naabtan ang 28-anyos nga naghigda sa kama nga wala nay sapot, luya  ug daw sabog nga di masabot ang gipanulti. Ang suspek kusganong mihimakak sa mga alegasyon kaniya ug nangangkon nga “they are my lovers.”   Gihimakak  usab niyang iyang gigamitan og drugas ang duha ug mireklamo usab sa paagi pagdakop kaniya sa mga polis.

Matud pa sa kabanay sa biyuda nga matag mahuman sila og inject sa suspek daw mawala sila sa ilang kaugalingon ug pagmata nila wala na silay mga sapot apil na ang suspek nga giingong motumar usab og tambal ug mag-inject sa kaugalingon.

Gikatakdang pasakaan og kasong kalapasan nga serious illegal detention, RA 9262 kon Violence Against Women and Children, posibleng kasohan usab siya og mga kasong rape ug gitan-aw pa usab kung makonsiderar nga illegal drugs ang mga nasakmit nga mga tambal gikan sa cottage ug uban pa tungod sa mga na-recover nga pornographic nga mga litrato sa iyang laptop ug tablet. (BANAT NEWS)