Hayop sa mga Tiamzon giturn-over ngadto sa iro

CEBU, Philippines - Ang Armed Forces of the Philippines-Central Command mi-turn over na kagahapon sa kustodiya nila ni  Ben, Joma, ug Wilma (ngalan sa mga binuhing hayop sa mga Tiamzon) ngadto sa Island Rescue Organization (IRO), ang ahensiya nga adunay igong kapabilidad sa paghupot sa mga hayop kagahapon sa buntag.

Ang tigpamaba sa Centcom nga si Lt. Jim Alagao miingon nga makaatiman man sila sa maong mga hayop apan ang IRO mao ang ahensiya nga mas nakahibalo sa panginahanglan sa maong mga hayop.

Si Atty. Nena Hernandez, executive director ug founder sa IRO, mibutyag nga ang duha ka iro ug usa ka iring temporaryo una nilang ikustodiya.

“These animals are their (Tiamzons) properties and they are not contrabands,” matud ni Hernandez nga midugang nga andam nilang ipresentar sa korte ang maong mga hayop kung gikinahanglan.

Ang maong mga hayop dili usab nila ipa-adopt hangtud dili moluwat og “ownership to adopt” si Wilma Tiamzon sa iyang mga binuhi.

Si Hernandez miklaro nga ang mga hayop himsog ug wala moagi og abuso kay wala silay nakita nga mga senyales nga na-trauma kini.

“Most of the animals traumatized would pee, shake or be in a corner and bite whenever they are touched,” butyag pa ni Hernandez sa press conference. Ang laing mga hayop nga nahibilin sa safehouse sa San Fernando gipakaon kini sa mga residente sa lugar pinaagi sa paghatag og sobrang pagkaon agi sa gate sa balay.

Si Hernandez nakig-alayon usab sa abogado sa mga Tiamzon alang sa “possible assistance” nga ihatag ni Wilma alang sa iyang mga hayop kung aduna man gani. Lakip sa gipangayo ni Hernandez mao ang dokumento sa vaccination sa maong mga hayop aron matagaan kini og vaccine kun gikinahanglan.

Ang maong mga hayop nakuha kini gikan kang Wilma, ang gitumbok nga Communist Party of the Philippines - New People’s Army’s secretary general, ug sa bana niini nga si Benito Tiamzon, nga giingong CPP-NPA chairman, sa ilang sakyanan niadtong nakalabay nga Sabado utlanan sa Carcar City ug Aloguinsan pinasikad sa warrant of arrest nga 15-counts nga murder.

Lakip sa narekober ang laptops, flash drives, mga armas ug mga bala.

Ang mga sakyanan anaa na karon sa kustodiya sa Criminal Investigation and Detective Group (CIDG)-7. (/EIM)(BANAT NEWS)