Kaso sa dengue mikunhod og 80 porsiyento

CEBU, Philippines -  Mikunhod og otsenta porsento ang kaso sa dengue sa unang quarter karong tuiga sa rehiyon siyete itandi sa susamang period sa miaging tuig.

Tinguha sa Deparment of Health nga pakunhuran pa gyud ang kaso sa dengue dinhi sa Central Visayas. 

Base sa talaan sa Regional Epidemiology and Surveillance Unit (RESU-7) nga sa unang tulo ka buwan ning tuiga adunay 830 ka mga kaso sa dengue kun itandi sa nakalabay'ng tuig sa samang kwarter nga miabot sa 4,866 ka kaso sa dengue.

Matud pa sa pangulo sa RESU-7 nga si Renan Cimafranca nga bisan sa pagkunhod sa kaso duna gihapoy tulo nga namatay apan mas ubos kini itandi sa 12 nga nakalas sa miaging tuig samang kwarter.

Ang DOH-7 malaumon nga magpadayon kini pinaagi usab sa tabang sa publiko nga magpakabana ug manglimpyo sa ilang tugkaran.

Pabilin nga nag-una ang dakbayan sa Sugbo ang adunay labing daghang kaso sa  dengue tungod kay highly urbanized ang lugar nga gisundan dayon sa Lapu-Lapu City, Dumaguete City, Sibulan, Minglanilla, Talisay City, Guilhulngan, Carcar City, Balamban ug siyudad sa Mandaue.

Giawhag ni Cimafranca ang katawhan nga magpakonsulta g’yud dayon sa doktor kun sila makasinati sa sintomas sa dengue aron matambalan dayon.

Gipahimangnoan ang katawhan nga dili magpundo og tubig tungod kay mao kini sagad itlogan sa mga lamok nga nagdala og dengue.

Sunod semana sa probinsiya sa Bohol partikular na sa Barangay Loon adunay ipahigayon nga spraying operation tungod kay ilang nakompirmar nga daghan og kaso sa chikungunya.

Ang tawo nga dunay chikungunya pwede ra moinom og tambal sa hilanat ug pain reliever. (BANAT NEWS)