CEBU, Philippines - Ang kadagkoan sa Bureau of Jail Management and Penology (BJMP-7) mibuwag niadtong mga piniriso nga gihulagway nila nga adunay sakit nga TB aron dili sila makatakud ug dili mosamot ang ilang balatian.
Si BJMP-7 Regional Director Deogracias Tapayan miingon nga ilahi nila og selda kadto’ng ilang matan-aw nga masakiton og TB aron dili mosamot ang ilang balatian ug dili makatakud sa ubang binilanggo.
Matud ni Tapayan nga dili usab nila pasagdan ang mao nga mga binilanggo kay patambalan sila sa BJMP aron dili sila makatakod sa ubang piniriso. Nahibaw-an nga ang statistics sa TB ingon sa misaka apan wala kaayo kini ikabalaka sa kadagkoan sa Department of Health kay giisip nila kini nga nagpakabana na ang katawhan.
Gisaulog sa nasud ang World TB Day kaniadtong Marso 24 ug gipahibalo sa DOH nga misaka ang kaso sa tuberculosis apan wala sila makabutyag og statistics.
Ang kadagkoan sa DOH nalipay kay nasabot nila nga ang mga tawo nasayod na nga mahimong matambalan ang maong sakit mao nga sila midangop na sa mga health centers ug sa mga tambalanan.
Ang TB dili lang motakboy sa mga dagkong tawo apan lakip na sa mga bata, labaw na sa mga binilanggo sa mga huot nga bilanggoan.
Si Jocelyn Tabotabo, ang TB Program Coordinator sa DOH, miingon nga tinguha gyud nila nga matambalan ang maong sakit hinungdan nga ilang gihingusgan ang ilang kampanya.
Si DOH-7 Assistant Regional Direktor Lakshmi Legaspi miingon nga ang mga tawo nga adunay sakit nga TB mahimong magpatambal sa mga Barangay Health Center tungod kay libre ang serbisyo.
Matud ni Legaspi nga nakuha nila ang target nga gihatag kanila sa World Health Organization (WHO) kalabot sa TB success treatment nga 85% tungod sa mga programa nga ilang gihimo. (BANAT NEWS)