CEBU, Philippines - Ang Bogo City police nagplano nga makigbayloay og video footages sa close-circuit television camera sa laing duha ka mga LBC remittance outlets nga nabiktima sab og pagpanulis sa Mandaue City ug Cebu City aron sa pagtan-aw kung ang mga responsable sa pagpanulis sa LBC- Bogo mao ba kadtong nanulis usab sa laing branch niini.
Ang kapulisan miangkon nga hinay ang kooperasyon sa LBC-Bogo nga nakapalangay usab sa ilang imbestigasyon kay kinahanglan pa man sila magpaabot sa feedback sa main office sa maong remittance center sa dili pa makakuha og footage sa CCTV.
“Nadugay mi og gamay tungod kay mag-agad pa kuno sila sa ilang higher office…among gibuhat kay gi-videohan na lang namo ang ilang nakuha pero original document wala gyud,†matud ni Chief Insp. Hermano Mallari, Bogo City police chief.
Pinaagi sa footages naglaom si Mallari nga mailhan ra unya nila ang mga tulisan. Wala usab gisalikway sa kapulisan ang anggulo nga inside job apan pasabot ni Mallari nga season na ang mga tulisan ug dili kini taga-Bogo.
“Bisan man gud ang tapad nga Palawan (remittance center) wala nakamatikod nga naay tulis sa LBC nga tapad ra gyud…diha na sila nakahibalo nga namiya na unya wala pa gyud ga-bonnet,†matud niya. Ang LBC sa Barangay Libertad, Bogo City maoy ikatulong outlet nga gitulis sulod karong buwana human maigo ang outlet sa Barangay Tabok, Mandaue City ug sa Barangay Taboan, Cebu City.
Upat ka tawo ang matud pa nisulod sa outlet ug usa nila armado og .38 revolver nga nagpakaaron- ingnong mga kustomer sa wala pa mideklara og tulis. Nakuha sa mga tulisan ang P70,000, mobile phones ug pocket wi-fi sa usa sa mga empleyado. /EIM (BANAT NEWS)