CEBU, Philippines - Nasikop sa mga sakop sa Provincial Intelligence Branch (PIB) sa Cebu City Police Office (CCPO) ang tulo ka magsuon ug duha ka lalaki sa buy-bust operation nga gipahigayon pasado alas 9:00 sa miaging adlaw sa barangay Hagnaya sa San Remigio.
Ang nangadakpan naila nga sila si Petronio Ramirez Jr., kinsa naa sa drug watchlist sa kapolisan sa lalawigan ug mga igsuon niining sila si Romeo Ramirez, Jessie Ramirez, Roger Ramirez, Aldrin Torres, Gerry Elorde, ug si Lowell Cabatingan.
Matud ni Sr. Supt. Noel Gillamac ang hepe sa Cebu Provincial Police Office nga ang maong buy-bust operation inabagan sa lokal nga kapolisan.
Si Supt. Rodolfo Albotra ang hepe sa Provincial Intelligence Branch miingon nga “family business†sa mga nadakpan nga Ramirez ang pagpamaligya og shabu ug giisip nga level 3 drug pusher si Petronio nga makadispatsar og 25 gramos nga shabu matag semana.
Nasakmit gikan kang Petronio ang 23 ka gagmay nga pakete nga gituohang shabu P500 nga marked money, mga gamit sa pagsuyop niini, digital nga timbangan, cellphone, kalibre .45 nga pistola, nga may pito ka bala ug tulo ka extra nga bala ug unom ka bala sa kalibre .380 nga armas.
Si Petronio ug si Gerry maoy naaktohan nga mibaligya og drugas ngadto sa poseur buyer samtang si Cabatingan nag-repack sa mga shabu.
Samtang si Romeo, Jessie, Aldrin Torres ug si Roger naaktohan sab nga nagsuyop og shabu sa kubol-kubol nga gipanag-iya ni Petronio.
Matud ni Gillamac nga naglisod gyud ang kapolisan sa lungsod sa San Remigio sa paghimo og buy-bust operation batok sa mga suspek tungod kay nailhan na sila sa mga molupyo sa maong lungsod.
Hinungdan nga nangayo og tabang si Insp. Alexander Ancao sa PIB aron sa pagkasikop ni Petronio. /EIM (BANAT NEWS)