Pag-umangkon gitigbas sa Tiyo

CEBU, Philippines - Gitigbas sa uyoan ang iyang 22-anyos nga pag-umangkon tungod sa pagduda nga gilabay’g bato sa biktima ang iyang anak didto sa Sitio Mahayahay, Barangay Cambinocot, dakbayan sa Sugbo kaniadtong Biyernes sa hapon. Si Arnel Lazarito, nakaangkon og tinigbasan sa wala niya nga dunggan, ulo ug wala nga kamot ug dali siya nga gidala sa duol nga Guba Emergency Hospital apan gibalhin ra usab sa Cebu City Medical Center (CCMC).

Ang mitigbas sa biktima mao si Juan Bajao nga mitahan ra usab sa kaugalingon ngadto ni barangay tanod Fernando “Andoy” Canoos.

Base sa pamahayag sa biktima nga naglingkod lang siya dihang kalit miabot ang iyang uyoan nga naglagot kaniya tungod kay nagduda nga siya maoy usa sa mibato sa iyang anak. Matud pa nga naglagot usab ang biktima ngadto sa iyang uyoan tungod sa mao nga pasangil.

Tungod sa kalagot sa biktima, iyang gihukas ang iyang T-shirt ug gibalibod dayon giwitik ngadto sa nawong sa iyang uyoan. Ang iyang uyoan nga gisakitan, abtik nga milanit sa iyang sundang ug gitigbas ang pag-umangkon.  (BANAT NEWS)