Daghang marijuana naibot sa Badian

CEBU, Philippines - Ang kapolisan sa lungsod sa Badian naka-ibot og gibana-bana nga dos mil ka punoan sa marijuana didto sa Barangay Basiao, usa ka bukirang bahin sa mao nga lungsod. Ang pagpangibot sa mga marijuana nga gihimo sa walo ka polis ug ilang tulo ka alalay gipangulohan ni Inspector Henry Orbiso, ang hepe sa kapolisan sa Badian.

Kaadlawon pa nga miabot ang kapolisan sa mao nga dapit ug dihang mibanag-banag na gisugdan dayon nila ang pagpangita sa mga marijuana plantation. Ang report nga miabot sa Cebu Provincial Police Office (CPPO) nga ania magbase sa dakbayan sa Sugbo, nagkanayon nga gisunog ra sa mga polis ang marijuana didto sa bukid.

Kini tungod sa kabug-at sa mao nga mga marijuana kun dad-on pa nila sa police station.

Wala matataw sa report kun kinsa ang tag-iya sa yuta nga gitamnan sa mga marijuana. Ang balaod naglatid nga ang kayutaan nga tamnan og marijuana angay’ng manubag ang mga tag-iya ug sila pasakaan og kaso.  (BANAT NEWS)