CEBU, Philippines - Kadtong mga mahiligon sa pag-bisekleta mahimo na sila nga makasulod dapit sa Seawall sa South Road Properties (SRP) kay ang konseho sa dakbayan sa Sugbo miuyon na sa ilang hangyo.
Si Konsehal Gerardo Carillo midala sa hangyo sa mga sakop sa Sugbo Bikers ngadto sa konseho sa dakbayan ug kini gisuportahan sa iyang kaubanan. Hinoon bisan og giaprobahan sa konseho nga makasulod ang mga bikers apan duna’y oras nga sila maka-bike sa maong dapit sa SRP ug kini himoon lang alas-4 hangtod sa alas-8 sa buntag ug matag alas-5 hangtod alas-8 sa gabii matag Lunes hangtod Sabado. Tibuok adlaw’ng Domingo makagamit sa mao nga lugar ang mga hilig mag-bike ug kadto’ng mag-jogging.
Ang Sugbo Bikers nga gilangkuban og kapin usa ka gatos ka sakop gipangulohan ni Robert Pangilinan. Matud pa ni Carillo nga ang seawall roadside sa SRP usa ka nindot nga lugar para sa maglingaw-lingaw ug mag-exercise ang katawhan tungod sa presko nga hangin ug kanindot sa palibot. Gisugyot usab ni Konsehal Mary Ann delos Santos nga tugotan na lang usab kadtong hilig maligo sa dagat nga anha maligo sa dagat sa SRP. (BANAT NEWS)