Gilugos nakatug-an nga gi-rape kay mitiyabaw nagtan-aw og TV

CEBU, Philippines - Usa ka dalagita nahibaw-an nga gilugos kini sa ugangan sa iyang iyaan kay mitiyabaw dihang nagtan-aw og salida sa telebisyon nga adunay eksena nga pagpanglugos.

Nasayran nga ang 14-anyos nga dalagita gilugos diay dihang 11 pa ang iyang pangedaron.

Ang biktima nga gitago lang ang ngalan giubanan sa iyang inahan  ug misumbong sa Talisay City Police Station (TCPS) Women and Children Protection Desk (WCPD) aron mapasakaan og kaso ang naglugos kaniya.

Gipasanginlan sa dalagita si Carmelo Secretaria, 52-anyos, taga Barangay San Roque, Talisay nga maoy miamong-among kaniya. Si PO3 Violeta Godinez sa WCPD mibutyag sa Banat News nga ang dalagita gisukit-sukit sa iyang apohan ngano nga mitiyabaw kini pagtan-aw sa salida sa TV nga dunay senaryo sa lugos.

Dinhi gitug-an sa dalagita ang gihimo nga paglugos kaniya ni Secretaria. Matud niya nga unang higayon nga gilugos siya ni Secretaria dihang siya ug ang anak sa suspetsado nangatulog sa lantay sa ilang balay.

Matud sa biktima nga dihang nakamata siya gisampongan na sa suspetsado og habol ang iyang baba ug dayon dali siyang gihuboan sa iyang sapot ug gilugos siya niini kaniadtong Mayo 11, 2011.

Tungod sa kahadlok, ang biktima wala dayon mosumbong ngadto sa iyang apohan kinsa maoy nag-atiman kaniya.

Matud sa polis nga magpaabot sila nga mobalik ang biktima dala ang medical examination aron mapasakaan na og kaso ang suspetsado didto sa piskaliya sa siyudad. (BANAT NEWS)