CEBU, Philippines - Ang kakuwang og mga fire hydrants usa sa rason kun ngano nga ang kabomberohan usahay maglisod pagpawong dayon sa mga sunog.
Mao kini ang gibutyag ni Bureau of Fire Protection (BFP)-7 Regional Director Maria Luisa Hadjula agi og pagpasabot ngano nga wala dayon mapawong sa mga bombero ang sunog nga miulbo sa Lorega-San Miguel.
Matud ni Hadjula nga kun daghan pa ang mga fire hydrants nga kakuhaan dayon og tubig sa mga bombero makabalik dayon sila sa nasunogan aron pagpawong sa sunog.
Sagad g’yud himoon sa mga kawani sa Metro Cebu Water District (MCWD) mao nga kun adunay sunog ila dayon nga i-divert ang kusog nga bul-og sa tubig paingon sa nasunogan.
Si Hadjula miingon nga mohangyo siya sa mga opisyal sa dakbayan sa Sugbo nga tabangan sila pagbutang og daghang fire hydrants, ilabi na sa mga dapit nga daghang kabalayan. Atol sa sunog kaniadtong Martes sa hapon, nakabantay ang katawhan nga nahutdan og tubig ang ubay-ubay nga mga trak sa bombero kay ang ilang tankers dugay nga makabalik nga naghakot og tubig.
Sistema sa kabomberohan nga dunay usa ka fire truck nga maoy magsigi og pasirit og tubig sa nasunog nga mga balay ug ang laing mga tanker maoy mosuplay niini og tubig.
Gisaad ni Konsehal Dave Tumulak nga mohimo siya og lakang aron matubag ang panginahanglan nga dugang fire hydrants.
Matud ni Tumulak nga tukma kaayo ang sugyot ni Hadjula nga butangan og dugang hydrants ang mga dapit nga daghang nagpuyo.
Gisugyot usab sa opisyal sa kabomberohan nga padak-an g’yud unta ang mga access roads sa kabarangayan aron dili maglisod ang kabomberohan kun adunay moulbo nga sunog.
Matud ni Mayor Michael Rama nga gusto niya nga madali ang pagpahigayon sa re-blocking sa mga nasunogan. (BANAT NEWS)