CEBU, Philippines - Gibati karon og kabalaka ang transport group sa dakbayan sa Mandaue sa gipatuman nga pagpakunhod og gamay’ng presyo sa produktong petrolyo tungod kay hayan ang bawos niini mao ang pagpausbaw sa presyo nga mas daku pa ang kantidad sa matag litro. Si Romeo Armamento, presidente sa Mandaue United Driver’s Association- National Confederation Transport-Worker’s Alliance (MUDA-NTCA) miingon nga naandan na nga ang mga dagkong kompaniya sa lana mopakunhod sa presyo sa ilang baligya kun may mga lakang sa pagpangayo og usbaw sa plitehan.
Matud ni Armamento nga ang pagpakunhod sa presyo sa mata’g litro sa lana mapahimuslan lang sa katawhan sa hamubo nga panahon apan makapaabot usab ang mga motorista og bawos nga dakong kantidad nga pagpausbaw sa presyo sa lana.
Ang mga dagkong kompaniya sa lana apil ang Petron ug Shell nagpahibalo nga sugod sa miaging Lunes sa tungang gabii gipakunhoran nila ang presyo sa ilang baligya ta’g 65 sentimos mata’g litro sa diesel, 70 sentimos sa kerosene ug 30 sentimos sa gasolina.
Si Armamento miingon nga bisan kun may pagpakunhod na sa presyo sa matag litro sa gasolina ug krudo ila gihapong ipadayon ang pagdemanda sa Land Transportation Franchising and Regulatory Board (LTFRB) 7 nga mohatag kanila og umento sa pletehan.
Gusto sa transport sector nga makatambong unta ang mga opisyal sa Department of Trade and Industry (DTI) 7 atul sa public hearing aron mahisgotan ang kanunay’ng pagsaka sa presyo sa mga pyesa ug ligid sa mga sakyanan.
Si LTFRB 7 Regional Director Ahmed Cuizon miingon nga hayan mohimo ang ilang opisina og public hearing sa gidemanda nga dugang kantidad sa pletehan nga gipangayo sa CITRASCO aron mahimo na nga P10 ang minimum rate. (BANAT NEWS)