CEBU, Philippines - Patay ang usa ka lalaki nga nagbarog kilid sa dalan dihang gipusil sa duha ka mga wa mailhing lalaki nga nagsakay og motor sa sitio Kampo sa barangay Tapul sa dakbayan sa Talisay sa miaging gabii.
Ang biktima naila nga si Noli Rabago, 30, nga molupyo sa nahisgutan nga lugar.
Basi sa imbestigasyon sa kapolisan nga ang biktima nagbarog kilid sa dalan dihang gihunongan sa mga mamumuno ug gipusil sa walang dughan.
Ang biktima daling gidala sa Talisay City District Hospital apan gideklarar na kini nga dead on arrival.
Narekober sa Homicide Section sa Talisay City Police Station sa crime scene ang usa ka kabhang sa kalibre .45 nga pistola.
Si PO1 Abraham Quijano nga nahinabi sa Banat News miingon nga ang biktima usa ka ex-convict ug bag-o lang nakagawas.
Sumala pa ni Quijano nga nag-atubang og kasong murder ang biktima apan nakagawas kini niadtong miaging tuig tungod kay nakadawat kini og parole.
Gihulagway ni Quijano nga kalmado ra ang maong tawo ug nagbag-o na kini dihang nakagawas sa prisohan.
Matud pa ni Quijano nga padayon pa karon ang follow-up operation nga gihimo sa kapolisan sa pag-ila sa mga gunmen. Usa sa gisubay mao ang posibilidad nga may kalambigitan sa kaso niya kaniadto ang maong pagpatay. (/EIM)(BANAT NEWS)