VECO nag- pasiugda og safety caravan

CEBU, Philippines - Ang Visayan Electric Company (VECO) misuroy sa mga tunghaang publiko sa Metro Cebu sugod kagahapon aron pagtudlo sa mga tinun-an sa elementarya unsaon paglikay sa aksidente kabahin sa kuryente. Si Risa Wycoco Coloyan, supervisor sa VECO, mibutyag nga ang ilang safety caravan nga gisugdan kagahapon ug matapos Abril 1 mobisita sa mga tunghaang elementarya sa Naga, San Fernando, Bulacao, Lawaan 1, Mohon, sa Talisay, dayon ang Talisay Central Elementary School.

Matud ni Coloyan nga bisitahon usab sa ilang team ang mga pinili nga tunghaan sa Tayud, Consolacion; Cabancalan ug Mandaue Central School ug Cebu City Central School.

Ang mga tinun-an sa Grade 5 tudloan kabahin sa pagresponde og katalagman ug ubang aksidente nga ilang masugatan kay ang VECO Team naglakip usab sa mga rescue experts gikan sa Emergency Research Center, usa ka Non-Government Organization (NGO) nga bansay sa rescue operation.

Ang mga bata pahimangnoan usab nga atol sa bakasyon dili maayo alang kanila nga magduwa og tabanog sa mga dapit nga daghang alambre sa kuryente aron dili sila makuryentehan.

Matud ni Coloyan nga daghan na nga mga aksidente nga mga bata nakuryentehan kun ang ilang mga tabanog masangit sa kuryente nga kusog ang boltahe. (BANAT NEWS)