Rota sa mga PUV sa SRP wala supaka sa konseho
CEBU, Philippines - Giendosar na sa Cebu City Council ngadto sa Land Transportation Franchising and Regulatory Board (LTFRB)-7 ang gitinguha nga bag-ong rota sa bus diha sa South Road Properties (SRP). Ang kadagkoan sa SM Supermalls-Visayas maoy misugyot nga hatagan og rota nga mobiyahe sa SRP ang High Quality Public Transport System (HQPTS).
Ang tulo ka bag-ong rota nga gisugyot ni SM Visayas Region Operations Manager Sherry Tuvilla mao ang Talisay-SRP-Mambaling-Talisay-SRP-Talisay; Talisay-SRP-Mambaling-SRP-Downtown (duol sa City Hall).
Ang laing rota mao ang SM City Cebu-North Bus Terminal-SM City Cebu-Downtown (duol sa City Hall)-SRP-Mambaling-SRP-Talisay; ug ang North Bus Terminal-SM City Cebu-Downtown (duol sa City Hall)-SRP-Mambaling-SRP-Downtown (duol sa City Hall)-SM City Cebu-North Bus Terminal.
Ang maong mga rota maoy agi-an sa gisugyot nga hybrid buses, usa ka-high quality mass transport utility nga padaganon sa diesel o kaha kuryente.
Kini maoy makita unya nga magdagan sa kadalanan subay sa mao nga rota sa sunod tuig atol sa pagbukas sa SM Seaside City Complex sa SRP mentras wala pa mapatuman ang Bus Rapid Transit (BRT).
Si Konsehal Nestor Archival maoy misugyot sa resolusyon nga nag-endorso sa bag-ong rota sa bus ngadto sa LTFRB.
Ang SM manager miingon nga ang hybrid bus makapasakay og 70 ka pasahero. Dili kini magbuga og itom nga aso ug gidayeg kini sa ubang mga nasud sa kalibotan kay giisip nga “environmental-friendly.†- /RUB (BANAT NEWS)
- Latest
