Upat patay sa aksidente

CEBU, Philippines - Upat ka tawo ang namatay sa mga managlahing aksidente sa kadalanan sa Sugbo, usa sa mga nakalas barangay kagawad sa Pinamungajan.

Sa dakbayan sa Lapu-Lapu, duha ang namatay sa aksidente sa motorsiklo sa managlahing takna ug dapit.

Misampak

Ang unang namatay mao si Benjie Tampus, 32, taga Sitio Mahayahay, Barangay Marigondon ug ang ikaduha mao si Dioscoro Yballe, 44 nga taga Sitio Libo, Barangay Tayud, Lungsod sa Consolacion.

Si PO1 Jeniffer Decatoria, imbestigador sa traffic division sa Lapu-Lapu City Police Office (LLCPO) miingon nga nagdagan ang motorsiklo nga giluwanan ni Tampus paingon sa barangay Agus.

Apan pag-abot sa nahitaboan, gikasungag niini ang multicab nga gimaneho ni Ben Aying Jr., 65, nga gikan sa barangay Mactan.

Matud pa ni PO1 Decatoria nga nawad-an sa kontrol ang gimaneho nga motorsiklo sa biktima hinungdan sa pagkalamba ug naligsan kini sa multicab ni Aying.

Gidala ang biktima sa Lapu-Lapu City District Hospital apan gideklarar kini sa mga doktor nga dead on arrival.

Nalatayan

Samtang sa laing aksidente, wa na madala pa sa tambalanan ang biktimang si Yballe  human kini madisgrasya diha sa Marcelo Fernan Bridge sa habig na sa barangay Pajo.

Si Yballe nalatayan gyud sa Prime Mover nga gimaneho ni Charlie Jabonita, 34, taga Pardo, dakbayan sa Sugbo.

Sumala pa nga bisan nagsuot og helmet ang biktima nabangil ang ulo niini sa trailer ug nalatayan.

Ang duha ka mga drayber nga mitahan sa kapolisan temporaryo karon nga gibalhog sa sulod sa detention cell sa kapolisan sa maong dakbayan alang tukmang lakang nga pagahimoon.

Konsehal patay sab

Patay usab ang usa ka barangay konsehal sa Barangay Butong, Pinamungajan, human kini madisgrasya sakay sa iyang gimanehong motorsiklo sa barangay Cabiangon mga alas 12:00 sa udto kagahapon.

Daling gidala sa Pinamungajan District Hospital si Rodulfo Tan human makaangkon og daghang samad sa kalawasan apan gideklarar kini nga dead on arrival.

Nasuta nga gikan pa seminar alang sa Liga ng mga Barangay sa Barangay Tajao ang biktima ug paingon na unta kining mupauli sa dihang nahitabo ang aksidente.

Matud pa nga nananghid si Tan sa mga kauban niini nga mupauli aron sa pagtumar sa iyang tambal. Sakay kini sa iyang Yamaha Crypton motorsiklo nga adunay plaka nga GR 6254 sa dihang kalit kining misaliring sa dalan ug maayong pagkaigo sa waiting shed hinungdan sa pagkaangkon niini og grabeng samad sa kalawasan.

Nasampak sa railings

Sa laing bahin, usa ka 21- anyos nga babaye ang namatay usab samtang samdan ang uyab niini sa dihang nadisgrasya sa national highway Barangay Dumlog, Toledo City alas 11:45 sa milabay’ng gabii. Si Jobelyn Longakit, ug Alex Mabilog, 34, pulos taga Barangay Talavera, sakay sa usa ka motorsiklo paingon sa Poblacion gikan sa Talavera dihang nahitabo ang aksidente.

Ang maong motorsiklo matud pa nga gipanag-iya ni Alfredo Tingal, taga Barangay Matab-ang apan hinulman lang ni Longakit.

Sa imbestigasyon sa kapulisan, nasuta nga misuway sa paglikay si Longakit sa sakyanan nga ilang gikasugat diha sa kurbadahong dalan apan tungod sa kakusog sa ilang dagan nalahos sila sa railings ug nangalabay.

Duha naangol

Sa laing bahin naangol usab ang duha ka tawo nga nadasmagan sa awto nga gimaneho sa usa ka Norwegian national sa dalan M.C. Briones, barangay Guizo, Dakbayan sa Mandaue alas-11 pasado ang takna sa miaging Sabado sa gabii. Ang mga naangol mao sila si Mark Anthony Cabahug, 22, ug Domenciano Capulong, 27, pulos taga Casuntingan sa maong dakbayan.

Naglakaw ang duha sa daplin sa dalan sa maong lugar dihang napunggit sila ni Frank Overaa, 39, usa ka Norwegian nga temporaryong nagpuyo sa Labangon, dakbayan sa Sugbo. Nasuta nga unang nabangga sa concrete barrier sa maong dapit si Overaa una pa kini nalahos sa mga biktima. Ang duha nalandig sa Mandaue City Hospital apan gibalhin kini ngadto sa pribadong tambalanan sa dakbayan sa Sugbo samtang gitanggong na sa kapolisan ang Norwegian. - /EIM (BANAT NEWS)