Brgy. fire brigades dako og ikatabang — City Fire Marshal
CEBU, Philippines - Giangkon sa kadagkuan sa Bureau of Fire and Protection (BFP) nga ang ilang mga sakyanan dili makasugakod sa pagpawong sa sunog sa bukid kini ilabina kun sakaon kaayo.
Sumala ni Cebu City Fire Department Chief Rogelio Bongabong sa usa ka radio interview nga dili tanang mga sunog nga dali nilang ma-respondehan ilabina nga duha ngadto sa tulo sa ilang dagkong mga fire trucks ang naguba.
Gihulagway hinuon ni Bongabong ang nangagubang fire trucks nga "vintage fire trucks" tungod sa kakaraan na niini hinungdan nga dali ra usab kining maguba kun mapaayo man kini.
Gitataw usab niini nga ang labing lisod nilang masulbad ang mga sunog nga anaa sa bukirang lugar tungod sa kalisod sa pagsaka sa mga fire trucks.
Hinuon dako og ikatabang ang mga fire sub station nga may bag-ong mga fire trucks.
Apan iyang gitataw nga mas makatabang usab sa ilang kampanya sa pagsumpo sa kalayo kun may barangay fire brigades nga nakapalit usab og mga fire trucks kay dali ra man silang makaresponde kun may sunog mismo sa ilang barangay. (BANAT NEWS)
- Latest
