Ang upat ka adik nga kawani sa Tinago dili taktakon sa trabaho
CEBU, Philippines - Ang kapitan sa Barangay Tinago nga si Joel Garganera mihukom nga iyang papadayonon pagtrabaho kadtong upat ka kawani sa barangay nga namatud-ang tiggamitan og shabu.
Ang lakang ni Garganera lahi kay sa baruganan sa mga opisyal sa Barangay Mabolo nga mihukom pagtaktak gayud sa upat nila ka kawani sa barangay nga napositibo sa kinalit nga drug test.
Upat sa kapin sa 80 ka kawani sa Barangay Tinago napositibo sa kinalit nga drug test nga gihimo sayo ning semanaha.
Matud ni Kapitan Garganera nga malooy siya sa dangatan unya sa mao nga mga kawani kun taktakon sila sa trabaho kay hayan mosamot ang ilang problema.
Gipasabot ni Garganera nga sama siya sa usa ka buotan nga amahan nga kun adunay anak nga mamatud-an nga tiggamitan og illegal nga drugas, iya kining patambalan.
Gibutyag sa kapitan nga sa wala pa himoa ang drug test ang mao nga mga kawani sa Barangay Tinago nga supporters niya sa politika miangkon na nga nakagamit sila’g shabu kaniadto.
Matud ni Garganera nga ang mao nga mga kawani misaad na nga magbag-o sila ug dili na mogamit og gidili nga drugas.
Si Garganera miingon nga kun human unya sa paghatag niya’g higayon sa maong mga kawani apan dili gihapon sila mag-usab, dili na niya sila tabangan. (BANAT NEWS)
- Latest