CEBU, Philippines - Nasikop sa mga sakop sa Port Police ang usa ka lalaki nga padulong unta molarga sa Ormoc City human nasakpang nagdala og marijuana ug .357 revolver sa Pier 3 kagahapong adlawa.
Ang nasikop naila nga si Roniegen Maasin, 23, taga barangay Magdugo sa dakbayan sa Toeldo nga migamit pa sa laing ticket aron lang makasakay sa usa ka barko.
Si Sr. Insp. Evan Epe nga nahinabi sa Banat News miingon nga ang x-ray operator nga si Gico Morales maoy nakasakop kang Maasin dihang gisusi ang iyang gamit.
Matud pa nga dihang nakita ni Morales nga dunay coin purse ang biktima iya kining gipaablihan ug nakita nga dunay usa ka putos nga marijuana ang suspetsado.
Busa gipahibalo dayon niini ang mga port police ug daling gidala ang suspek aron kini imbestigahon.
Dihang girekisa na kini sulod sa opisina sa Intelligence and Investigation Section sa Port Police nakuhaan kini sa maong armas nga may upat ka bala.
Ang suspek nga nahinabi sa Banat News miingon nga iya ang maong marijuana ug ang armas. Matud niya mao kini iyang gigamit pagbantay sa usa ka cock fighting farm sa Toledo.
Dihang gipangutana nganong lahi man ang ngalan nga naa sa ticket niini miingon ang suspek nga hinatag ra ang maong ticket kaniya. (BANAT NEWS)