Wala dayon uyoni ang pagkuha’g duha ka consultant sa Talisay

CEBU, Philippines - Wala dayon uyoni sa mga konsehal sa dakbayan sa Talisay ang pagkuha’g duha ka consultant kay ilang gusto nga pangutan-on usa sila kun unsa’y ilang ikatabang sa higayon nga kuhaon ang ilang serbisyo.

Ang gitinguha nga kuhaong consultant mao si Ulysses Julia alang sa Barangay Affairs ug si Charles Basillote isip Political Affairs consultant.

Si Konsehal Edward Alesna maoy miduso og resolusyon nga kuhaon sila si Julia ug Basillote isip mga consultants apan ang mao nga lakang gikwestyon ni Konsehal Raul Cabañero.

Naglibog si Cabañero nganong kuhaon man nga consultant si Julia nga wala man gani kini mapili isip opisyal sa barangay.

Ang ubang konsehal sa Talisay misuporta ni Cabañero mao nga gilangan usa nila ang pag-aprobar sa resolusyon.

Giapil na lang ‘sab nga wala dayon uyoni ang lakang pagkuha sa serbisyo ni Basillote isip consultant on political affairs.

Si Basillote nahimo na nga kapitan kaniadto sa Barangay Dumlog ug napili usab nga presidente sa Association of Barangay Councils (ABC) nga naglingkod isip ex-officio member sa konseho sa Talisay sulod sa tulo ka tuig.

Matud ni Bise Mayor Romeo Villarante nga nahukman sa konseho nga sila si Julia ug Basillote imbitahon nila sunod sesyon aron pangutan-on kun unsay matabang nila kun kuhaon sila nga consultant sulod sa unom ka buwan. (BANAT NEWS)