CEBU, Philippines - Mag-atubang gihapon og imbestigasyon si PO1 Julius Patac bisan pa man og nasikop pagbalik ang piniriso nga si Dionesia Lumantao nga mi-eskapo dihang iyang gipagawas sa selda aron magpatutoy sa iyang anak.
Si Superintendent Renato Malazarte, deputy provincial director for administration, miingon nga bisan nadakpan na ang mieskapo nga piniriso mag-atubang gihapon og kaso si PO1 Patac.
Sumala pa ni Malazarte nga padayon karon ang imbestigasyon sa Provincial Intelligence Branch sa kaso sa maong polis.
Si PO1 Patac gimandoan na nga mosumiter og pinanumpaan nga pamahayag kabahin sa kaso.
Ang mipuga nga piniriso nadakpan kaniadtong Martes sa gabii didto sa bus terminal sa dakbayan sa Bogo atol sa “follow-up operation†nila ni PO1 Patac ug mga kaubang polis.
Nahibaw-an nga si Lumantao nananghid kang PO1 Patac nga magpatutoy sa iyang anak apan dihang nalipat ang polis miikyas.
Matud ni Malazarte nga kun mapamatud-an nga dunay nahimong kalapasan si PO1 Patac, hayan mag-atubang usab siya og kaso nga kriminal kabahin sa “Infidelity in the custody of prisoner.†(BANAT NEWS)