Tigbaligya’g pagkaon susihon kanunay

CEBU, Philippines -  Ang kadagkoan sa Lapu-Lapu City Health Department nangangkon nga gipanid-an nila kanunay ang mga tigbaligya og pagkaon sa ilang dakbayan aron malikayan nga adunay masakit tungod sa hugaw’ng pagkaon.

Ang pamahayag ni Lapu-Lapu City Health Officer Rodolfo Berame iyang giluwatan human nga daghan ang natakboyan og "typhoid fever" o tipos didto sa lungsod sa Tuburan sa miaging semana.

Matud ni Berame nga bisan pa og walay kaso sa tipos ang dakbayan sa Lapu-Lapu apan dili sila mokumpyansa kay dali ra kining mokatap ilabi na gikan sa hugaw’ng pagkaon ug tubig.

Tungod niini ang mga health inspectors subsob nga mihimo og pakisusi sa mga food handlers o tigluto’g pagkaon sa mga gagmay’ng kan-anan kun wala bay mga sakit ang tawo nga nagpreparar sa pagkaon.

Si Berame miawhag sa mga food handlers nga magpahiling g’yud didto sa ilang opisina. Apil nga makamugna og sakit mao ang hugaw nga tinubdan sa tubig nga mainom mao nga kinahanglan ang "water chlorination" aron mapatay ang kagaw sa tubig.

Matud ni Berame nga adunay silot nga ipahamtang niadtong mga kan-anan nga dili motuman sa lagda sa ilang buhatan kalabot sa proper food handling.   (BANAT NEWS)