Gipatay giputos og insulator

CEBU, Philippines -  Patay na nga nakaplagan ang lending collector nga giputos og heat insulator ug gigaid sa luyong bahin sa lingkoranan sa iyang motorsiklo nga gibiyaan didto sa Sitio Simborio, Barangay Tayud, Liloan kaniadtong Lunes sa tungang  gabii.

Ang gipatay mao si June Quijano, kawani sa Fund Line Lending Company kang kansang buhatan nahimutang sa dalan A. C. Cortes, Barangay Banilad, dakbayan sa Mandaue.

Si PO3 Jesson Gayo sa Liloan Police Station miingon nga nagpatrolya ang iyang mga kaubang polis nga gipangulohan ni PO3 Walter Quirol dihang ilang naagian ang motorsiklo nga gibiyaan ug may kargang  tawo sa luyo.

Dugang pa ni Gayo nga gidudahan nila nga gitulis ang biktima sa wala pa kini patya. Ang lawas sa biktima giputos og insulator ug gihiktan og pisi dayon gigaid sa luyo’ng lingkoranan sa motorsiklo

Sa pakisusi sa kapolisan ilang nahibaw-an nga gikang nangolekta sa kabarangayan ang biktima sa wala pa kini patya. Lakip sa mga utangan nga gipaninglan sa biktima nagpuyo sa Barangay Jugan, Consolacion ug kasikbit nga kabarangayan sa Liloan.

Si PO3 Gayo miingon nga  dunay daghang samad sa ulo ang biktima nga gidudahang inagian sa pagbunal og gahi nga butang ug wala na ang iyang mga personal nga gamit ug ang kwarta nga iyang nakolekta.

Si SPO4 Windrey Pilapil miingon nga si SPO3 Marcelino Servilla ug mga kauban padayon pa nga naghimo og imbestigasyon ug pagsubay sa mga dapit nga giadtoan sa biktima.

Si SPO4 Pilapil mitug-an sa Banat News kagabii nga duna sila’y nadakpan nga suspetsado pagpatay ni Quijano apan wala pa nila ibutyag ang ngalan sanglit padayon pa kini nila nga giimbestigar.  (BANAT NEWS)