Ang DPWH giawhag nga dili magpataka’g labay sa kinubkob

CEBU, Philippines -  Ang mga opisyal sa dakbayan sa Mandaue miawhag sa mga tinugyanan sa 6th Engineering District sa Department of Public Works and Highways (DPWH) 7 nga ang mga kinubkob nga semento gikan sa giayo nga mga karsada adto nila ilabay sa relocation site sa barangay Paknaan.

Ang hangyo sa mga opisyal sa Mandaue gipaagi sa resolusyon ni Konsehal Diosdado Suico nga nag-awhag ni Engr. Suzette Nwanaka, ang OIC-District Engineer sa DPWH 6th District Engineering Office.

Matud ni Konsehal  Suico nga ang 6.5 ka ektarya nga luna nga maoy relocation site sa mga informal settlers nagkinahanglan pa nga kaabunohan og mga lapok o bato kay ang dapit nahimutang man sa lupa nga lugar sa barangay Paknaan.

Apil sa mga balhinon didto sa mao nga relocation site mao kadtong mga nagpuyo sa kuyaw nga mga lugar sama sa daplin sa Mahiga Creek sa Barangay Subangdaku; Butuanon River sa Barangay Maguikay ug uban pa.

Ang DPWH pinaagi sa gikuha nila nga kontraktor nagsemento karon sa daghang mga karsada sa Mandaue. (BANAT NEWS)