CEBU, Philippines - Mananagat nga na-missing human gikatahong nabanggaan og usa ka cargo vessel ang pumpboat nga ilang gisakyan napalgan sa lungsod sa Oslob apan patay na pasado alas 6:00 sa miaging gabii. Ang napalgan naila nga si Christopher Aguitong, 33, molupyo sa barangay Consolacion sa lungsod sa Dalaguete. Napalgan si Aguitong sa tulo ka mga mananagat nga taga Alegria nga naglutaw sa tunga-tunga sa dagat sa barangay Lagundi sa lungsod sa Oslob.
Tungod kay naglisod ang mga mananagat sa pagkarga sa patay nga lawas sa biktima gihigtan na lang nila kini og pisi ug giguroy padulong sa baybayon ug mitawag sa kapolisan.
Ang kapolisan ug si Dr. Christopher Amit sa Rural Health Unit sa Oslob maoy misusi sa patay lawas ni Aguitong diha sa Lagahid Funeral Homes. Pipila ka oras ang milabay miabot sa lugar ang asawa ni Aguitong ug mikompirmar nga ang napalgang patay mao gyud ang iyang bana.
Si Aguitong na-missing human kini gikatahong milayat sa pumpboat nga ilang gisakyan human sila mabanggai sa M/V Subroad Yatsuka sa kadagatan sa Alcoy niadtong petsa 8 sa Marso.
Una nang naluwas ang duha ka kauban niini nga sila si Armando Edellon ug Tirso Veblista.Wala pay aksyon nga gihimo ang mga awtoridad paggukod sa maong barko aron manubag sa pagdasmag sa panagatan sa mga biktima. (BANAT NEWS)