Cash for work program sa Talisay gilusad

CEBU, Philippines - Ang mga kabus nga Talisaynon makapahimulos na unya sa Cash For Work Program sa Department of Social Welfare and Development (DSWD).

Kini human gipalabang niadtong Martes ni Konsehal Socrates Fernandez ang resolusyon nga naghatag og pagtugot kang Mayor Johnny De los Reyes sa paggama og Memorandum of Agreement (MOA) tali kang Mercedita Jabagat, Director IV sa DSWD field office-7 sa pag-implimentar sa Socio Economic and Economic Program sa DSWD nga giaprubahan usab sa konseho.

Ang nahisgutang ahensiya migahin og P2,307,900 alang sa Cash for Work Program alang sa mga biktima sa oil spill human sa nahitabong panagbangga sa duha ka dagkong barko nga M/V Saint Thomas de Aquinas ug Sulpicio Express 7 sa milabay’ng tuig.

Nunot niini, si Talisay City Public Information Officer, Vincie Monterde nagkanayon nga ang City Social Welfare na ang mohashas sa mga makabenipisyo sa nahisgutang programa.

Matud ni Monterde nga ang mga makabenipisyo kadtong mga biktima sa oil spill, mga out of school youth ug uban pang mga kabus nga Talisaynon nga nagkinahanglan og trabaho.

Ang lokal nga kagamhanan maoy mo-assist sa DSWD sa pag-implimentar sa programa.  Ang makabenipisyo sa programa madestino kini diha sa Green Valley Program (GVP) sa siyudad diin mananom sila og mga utanon.

Ug ang uban usab madestino sa pagpanglimpiyo sa mga kanal diha sa kabarangayan. Ang makabenipisyo sa Cash for Work Program makatrabaho kini sulod sa 10 ka adlaw ug magdawat og kapin sa P200 nga sweldo matag adlaw. (/EIM)(BANAT NEWS)