CEBU, Philippines - Ang kadagkoan sa Department of Education (DepEd-7) mipahibalo sa mga ginikanan nga sa bulan sa Hunyo gihapon ang pagbukas sa klase karong tuiga. Si DepEd-7 Regional Director Carmelita Dulangon miingon nga wala sila makadawat og kamanduan gikan sa ilang ulohang buhatan nga nag-uswag sa enrollment ug sa pagbukas sa klase.
Kini kay ang kadagkuan sa DepEd wala’y nakitang basihanan nga usbon ang pagbukas sa klase gikan sa Hunyo ngadto sa Oktubre base sa sugyot sa mga dagkong unibersidad sa Manila.
Gani gipahibawo ni Dulangon nga nagmalampuson ang ilang Early Enrollment nga gipahigayon niadtong miaging bulan. Subli usab nga giawhag ni Dulangon ang mga maestra nga himuon lang g’yud nga simple ang graduation exercises karong bulana.
Gidasig ni Dulangon ang mga ginikanan nga mosumbong kaniya kun pugson sila sa mga magtutudlo paghatag og dagkong amot aron lang makapaso sa graduation ang ilang mga anak. (/RUB)(BANAT NEWS)