Trigo nga nayabo sa SRP tunnel, unom ka sakyanan nagkarambola

CEBU, Philippines - Tungod sa sinakong trigo nga natagak gikan sa dump truck unom ka mga sakyanan ang nagkarambola nga miresulta sa pagkaangol sa duha ka tawo ug sa pagkalimbuwad sa usa ka sakyanan sa subway sa South Road Properties alas 8:00 sa miaging gabii.

Base sa imbestigasyon sa kapolisan nga ang dump truck nga gimaneho ni Gilbert Obejero, 43, taga Jaclopan sa dakbayan sa Talisay misulod sa subway apan natagak sa luyo sa dump truck ang sinakong trigo nga karga niini ug nagpasad sa karsada ang maong mga trigo.

Ang mga nagsunod nga sakyanan wala gilayon makabantay sa maong hitabo ug naligsan ang trigo apan nakaapektar kini sa mga ligid hinungdan nga nangawad-an sila og control. Si Shanette Temblor, 20, taga San Isidro Talisay, nga nagmaneho sa usa ka Toyota Avanza nabangga sa gutter nga miresulta sa iyang pagkaangol ug sa sakay niini nga si Jane Castaneda, 20, ug parehong gidala sa Miller Hospital.

Samtang ang nagsunod sab nga sakyanan nga usa ka Toyota Altis Sedan nga gimaneho ni Maximo Sato Jr., 38, nakaangkon og kadaot sa likod nga bahin sa iyang sakyanan. Natumba sab ang motor nga gimaneho ni Stephen Henry Tenefrancia, 28, samtang nakaangkon og kadaot sa likod nga bahin sa iyang sakyanan ang Toyota Corolla Sedan nga gimaneho ni Paul Salvador, 37.

Laing nagmotor nga si Margarito Bustamante, 54, natumba sab. Samtang nalimbuwad ang usa ka multicab nga gimaneho ni Cipriano Mendez, 64, human niini maligsi ang mga trigo nga nagpasad sa subway. Ang drayber nga si Obejero gisikop sa kapolisan ug mag-atubang kini og kasong reckless imprudence resulting in physical injuries and damage to properties. - /EIM (BANAT NEWS)