CEBU, Philippines - Mitahan ngadto sa kapolisan ang taxi driver nga nakadam-ag og motorsiklo nga misangpot pagkamatay sa tawo nga nagsakay sa motor.
Si Joselito Lopez, 51, taga Barangay Basak-San Nicolas, dakbayan sa Sugbo nakadam-ag sa motorsiklo nga gimaneho ni Andres Barbas, 47, nga taga Sitio Centro, Labogon, Mandaue.
Si Barbas nagmaneho sa iyang XRM nga motor didto sa dalan M. J. Cuenco Avenue duol sa Chinese Cemetery kaniadtong Miyerkules sa buntag dihang nadam-agan siya sa taksi. Ang taxi driver gikataho nga didto na moagi sa agianan ni Barbas ug aksidente kini nga nadam-agan niya ang motorsiklo.
Si Barbas nga nakaangkon og mga pangus ug bun-og sa kalawasan dali nga gidala sa Vicente Sotto Memorial Medical Center (VSMMC) aron matambalan apan wala makaantos, namatay.
Si Lopez gitanggong pa samtang giandam na ang kaso nga homicide through reckless imprudence nga ipasaka batok kaniya ugma. - /RUB (BANAT NEWS)