Duha ka patay wala gihapon maila
CEBU, Philippines - Nagpabilin nga wala gihapon mailhi ang duha ka patay’ng lawas nga napalgan sa lainlaing dapit sa dakbayan sa Mandaue.
Ang mga patay’ng lawas anaa sa Rolling Hills Funeral Parlor sa dalan A.S. Fortuna sa Barangay Banilad.
Si SPO1 Gregorio Cabizares, sakop sa Presinto 3 sa Mandaue City Police Office (MCPO), miingon nga ang patay’ng lawas sa lalaki nakaplagan kini sa ilawom sa taytayan sa Butuanon River sa barangay Paknaan nga anaa sa 30 ngadto sa 40 ang panuigon.
Ang patay’ng lawas may gitas-on nga 5’2†ngadto sa 5’ 4†ka tiil ug nagsul-ob og jacket, ingon man itom ug blue nga short pants ug adunay samad sa ulo.
Gituohan nga napantok ang maong tawo ug maoy nakaingon sa iyang kamatayon.
Si PO3 Nirsas Baay, sakop sa MCPO, miingon nga nagpabilin usab nga wala pa hiilhi ang usa ka lalaki nga nakaplagang naglutaw sa dagat ilawom sa Mactan-Mandaue Bridge.
Ang maong tawo hinoon nakit-an nga mituyo gayud sa pagpakamatay pinaagi sa paglukso ngadto sa dagat gikan sa ibabaw nga bahin sa taytayan.
Giawhag sa kapolisan kadtong nawad-an og kabanay nga susihon sa morgue sa Rolling Hills basin ang mao nga mga patay’ng lawas mao ang ilang gipangita. - /RUB (BANAT NEWS)
- Latest
