CEBU, Philippines - Usa ka polis nga miyembro sa Regional Intelligence Division sa Police Regional Office 7 ang gireklamo kay giingong nanumbag og usa ka Koreano ug nanukmod sa mabdos niini nga kapuyo niadtong Huwebes sa gabii sa Takira Homes, Barangay Talamban, ning dakbayan sa Sugbo. Giingong gitabangan og sumbag sa usa ka polis nga taga Barangay Pit-os ug sa drayber niini nga taga Mandaue City ang 47-anyos nga si Park Dae Ho nga naigo sa iyang apapangig.
Giingon sab nga gitukmod sa maong polis ug sa laing kanhi polis nga na-dismiss tungod sa kasong murder, ang kapuyo sa Koreano nga si Michelle Jean Emperado Siwano nga walo ka buwang mabdos sa dihang buot kining moulang sa duha.
Matud pa nga gipaninglan ang Koreano sa utang niini sa usa ka Gregorio Dealagdon. Bitbit ang final demand letter gikan sa usa ka abogado miadto ang collector ni Dealagdon nga si Wilfredo Vienes Naval ug ang mga suspek sa balay sa duha.
Giingong may utang ang Koreano nga P90,000 apan gi-deny kini sa maong langyaw kay matod pa niya may dala siya nga P6 milyones pag-anhi sa Pilipinas.
Bisa’g way giingong dakong bun-og ang mga biktima, gitambagan sila nga magpa-kurasyon. Gi-refer na sa Police Station 8 ang maong kaso sa Barangay Talamban. - /EIM (BANAT NEWS)