CEBU, Philippines - Gibuhian na sa mga gidudahang kidnappers ang bise mayor sa lungsod sa Hadji Muhtamad, Basilan usa ka adlaw human kini gisignit sa mga armadong lalaki sa gawas nga bahin sa usa ka shopping mall sa Zamboanga City niadtong Martes.
Matud pa nga ang anti-kidnapping task force mipahibalo nga gibuhian na si Bise Mayor Arsina Nanoh sa Zamboanga City. Ang bana ni Nanoh nga si Alnajil Nanoh mitug-an sa kapolisan nga gitawgan siya sa iyang asawa pinaagi sa cellphone nga gidala siya sa wa mailhing mga lalaki sa usa ka lawak ug gitaptapan iyang mata.
Gawas sa pagka opisyal sa lungsod, negosyante usab og mga bulawang alahas si Nanoh.
Si Nanoh milarga dayon padung sa Manila human siya gibuhian aron magkita sa iyang bana.
Wa pa matino kung duna bay ransom nga gibayad ang pamilyang Nanoh ngadto sa mga kidnappers nga hangtud karon wala pa mahibaw-i kung mga sakop ba sa Abu Sayyaf group nga maoy responsable sa mga kidnappings for ransom sa Mindanao. - AP/EIM (BANAT NEWS)