CEBU, Philippines - Gipahunong sa Department of Labor and Employment (DOLE) ang demolisyon sa kabalayan sa Sitio San Miguel, Apas kagahapon kay nasakpan nga daghang menor de-edad gipanggamit isip sakop sa demolition team.
Si DOLE senior labor employment officer Russell Cañete mimando ni court sheriff Edilberto Suarin nga undangon ang demolisyon ug siguroon nga wala nay menor de-edad nga moapil.
Ang mga sakop sa City Hall ug mga opisyal sa Barangay Apas maoy nangreklamo human mahibaw-i nga padayon gyud nga gipaguba ni Suarin ang kabalayan bisan wala pa kini maka-comply sa requirement sa DOLE.
Gimandoan ni Cañete si Suarin nga ipasabot ngano nga migamit sila og mga menor de edad isip sakop sa demolition team.
Nasakpan ang paggamit og menor de-edad nga sakop sa demolition team human madakpi sa mga tanod ang 16-anyos nga nangawat og mga butang gikan sa mga gipanggubang kabalayan.
Ang mga sakop sa demolition team nagtaptap sa ilang nawong atul sa pagpangguba nila sa kabalayan sa yuta nga gipanag-iya ni Aletha Suico-Magat.
Ang pangulo sa Division for the Welfare of the Urban Poor (DWUP) nga si Atty. Collin Rosell mihangyo usab kang Suarin nga mopresentar og papeles sa mga sakop sa demolition team.
Samtang nagpaabot ang DOLE ug ang DWUP nga makahatag si Suarin sa ilang gipangayo, nahibaw-an na lang sa taga City Hall nga nagpadayon diay ang pagpangguba sa kabalayan.
Gani miulbo ang gamay’ng tensyon dihang ang masuk-anon nga sila si Atty. Rosell ug City Hall executive assistant Jade Ponce mihulga nga ipadakop unta nila si Suarin tungod sa iyang pagtugot nga ipadayon ang demolisyon.
Si Rossell nagkanayon nga sunod-sunod na gyud ang paglapas sa court sheriff sa balaod.
Si Suarin, human mupirma sa order sa DOLE, nilakaw ug wala na magpa-interview sa media. (BANAT NEWS)