CEBU, Philippines - Gipapriso sa huwes ang usa ka 30-anyos nga lalaki niadtong Huwebes sa buntag kay wala motambong sa husay sa iyang kaso didto sa korte.
Si Noel Cabase, ulitawo nga nagpuyo sa Barangay Casuntingan, Mandaue gidakop base sa bench warrant nga giluwatan ni Regional Trial Court (RTC) Branch 16 Judge Sylva Aguirre Paderanga.
Nag-atubang og kaso si Cabase kabahin sa pagkalambigit niya sa illegal nga swertres ug gipasakaan siya og kaso nga paglapas sa Republic Act 9287 nga nagpasaka sa silot sa illegal numbers game.
Matud pa ni PO2 Jay-R Galabin nga wala motungha si Cabase dihang gitakda ang paghusay sa iyang kaso mao nga nasuko ang huwes ug gimandoan ang kapolisan nga siya dakpon. Si Paderanga mimando nga si Cabase makagawas lang kun mobayad og P20,000 nga piyansa sa iyang kaso. (BANAT NEWS)