CEBU, Philippines - Patay nang napalgan niadtong miaging hapon sa iyang amahan ang usa ka lalaki nga giingong naghikog gamit ang pisi nga gihikot sa iyang liog ug gikutay ngadto sa punoan sa Chikos luyo sa ilang balay sa barangay Punay, lungsod sa Aloguinsan.
Ang namatay naila nga si Darwin Tanud-tanud, 40, molupyo sa nahisgutang lugar.
Ang amahan ni Darwin nga si Emilio daling nanawag og tabang sa ilang mga silingan ug paryente ug gitangtang ang pisi nga gihigot sa iyang liog.
Ang Municipal Health Officer nga si Dr. Aleksander Lyle Ylanan uban sa mga polis ang mideklara nga patay na si Darwin. Matud pa nga may gihambin nga problema si Tanud-tanud apan wala kini mosulti kun unsa.
Si PO2 Leonides Ledona mibutyag sa Banat News nga si Darwin buwag na sa asawa ug lima na ka buwan nga nag-antos sa depression. (BANAT NEWS)