CEBU, Philippines - Hukman sa korte karong adlawa kun pugngan ba ang pagpangguba sa 157 ka balay sa yuta nga gipanag-iya sa pamilya’ng Magat didto sa Sitio San Miguel, Barangay Apas, dakbayan sa Sugbo.
Apan sigurado nga kulbaan g’yud ang mga hingtungdang molupyo kay karon usab nga adlawa nga gimando sa laing huwes nga demolison ang mao nga kabalayan.
Base sa inpormasyon, si Regional Trial Court (RTC) Judge Alexander Acosta gikatakda nga mopagawas og hukom sa gipangayo nga Temporary Restraining Order sa mga molupyo.
Matud ni Konsehal Sisinio Andales nga angayang isyuhan g’yud og TRO sa korte aron nga dili ihinayon ang pagpatuman sa demolition order nga giisyu ni Judge Pamela Baring-Uy sa Municipal Trial Court in Cities.
Apan si Judge Acosta miingon nga walay hurisdiksyon ang RTC ngadto sa sheriff ni Judge Uy mao nga wala kini mapahibalo nga maghuwat sa order sa RTC karong adlawa.
Naglaum ang taga Sitio San Miguel, Apas nga papugngan ni Judge Acosta ang demolisyon nga gimando ni Judge Uy. (/RUB)(BANAT NEWS)